ខេត្ត​មណ្ឌលគិរី ​ដូច​ប្រទេស​ពីរ​ បង្ហាញ​ដោយ​គេហទំព័រ​​ពិភព​លោក​ Lonely Planet ​

វាលស្មៅ​ដ៏​ក្រាស់​ ពណ៌​ខៀវ​​ខ្លះ​ និង​ក្រហម​ប្រឿង​ៗ​ខ្លះ​​ អម​សងខាង​ផ្លូវ​ជាតិ​មួយ​ខ្សែ​ តែង​ទ្រេត​យោល​យោគ​ទៅ​មក​ តាម​ជំនោរ​ខ្យល់​បក​បោក​នៃ​ខែ​កត្តិក។ ពេល​ទៅ​ដល់​វាល​ស្មៅ​លាត​សន្ធឹង​លើ​ហ្វូង​ភ្នំ​តូច​ធំ​នេះ​កាល​ណា​ សញ្ញា​ប្រាប់​ថា​ ការ​ធ្វើ​ដំណើរ​ជិត​បាន​ទៅ​ដល់​គោល ​ដៅ​ហើយ។ មិន​យូរ​ប៉ុន្មាន​ ទីក្រុង​ដ៏​តូច​មួយ​នឹង​លេច​បន្តិច​​ម្ដង​ៗ​នៅ​ចំពោះ​មុខ​គេ។ នោះ​គឺ​ក្រុង​សែន​មនោរម្យ​ ទី​រួម​ខេត្ត​មណ្ឌល​គិរី។

ទិដ្ឋភាព​ទាំង​ឡាយ​ដែល​អ្នក​ដំណើរ​បាន​ប្រទះ​ឃើញ​នៅ​អម​សងខាង​ផ្លូវ​ មុន​ទៅ​ដល់​ទី​រួម​ខេត្ត​នេះ​ គឺ​ជា​ផ្នែក​មួយ​ធ្វើ​ឲ្យ​ខេត្ត​មណ្ឌល​គិរី​មាន​ឈ្មោះ​បោះ​សំឡេង​ ទាក់​ទាញ​ភ្ញៀវ​ទេសចរ​ជាតិ​ និង​អន្តរជាតិ​ ជា​ពិសេស​នៅ​រដូវ​រងា​ នា​ខែ​កត្តិក​នេះ​តែ​ម្ដង។

ម្ចាស់​ផ្ទះ​សំណាក់​​ប៊ូស្រា​ក្នុង​ខេត្ត​មណ្ឌល​គិរី​ ដែល​មាន​ភ្ញៀវ​ខ្មែរ​និយម​មក​ស្នាក់​នៅ​ភាគ​ច្រើន​ លោក​ រាជ​ សំណាង​ ឲ្យ​ដឹង​ថា​ នៅ​ថ្ងៃ​បុណ្យ​​​​អុំ​ទូក​ខាង​មុខ​នេះ​ នឹង​មាន​ភ្ញៀវ​បាក់​មក​ជួល​បន្ទប់​របស់​លោក​​ច្រើន​​មិន​ខាន​ ព្រោះ​ជា​ទម្លាប់​រាល់​ឆ្នាំ​​សម្បូរ​មនុស្ស​បុក​មក​លេង​ណាស់​ក្នុង​ឱកាស​ បុណ្យ​ទាន​​អីចឹង។ ពេល​នេះ​ លោក​កំពុង​ត្រៀម​បន្ទប់​បម្រុង​សម្រាប់​ឆក​យក​ភ្ញៀវ​ក្នុង​ឱកាស​នេះ។

អ្នក​ទទួល​ភ្ញៀវ​​ផ្ទះ​សំណាក់​ Bungalow​ Nature Lodge ​ដែល​សម្បូរ​ភ្ញៀវ​​បរទេស​ភាគ​ច្រើន​ លោក​ លុញ ចិន្ត្រា​ ឲ្យ​ដឹង​ថា​ ចំនួន​ភ្ញៀវ​ទេសចរ​​នឹង​កើន​ឡើង​នៅ​ក្នុង​ខេត្ត​មណ្ឌល​គិរី​នេះ​ នៅ​ពេល​ណា​រដូវ​ប្រាំង​ចាប់​ចូល​មក​ដល់​ ព្រោះ​តំបន់​កម្សាន្ត​ខ្លះ​ចាប់​ផ្ដើម​ស្ងួត​ ធ្វើ​ឲ្យ​ភ្ញៀវ​ទេសចរ​អាច​ដើរ​កម្សាន្ត​បាន​យ៉ាង​ស្រួល។

ចិន្ត្រា​បញ្ជាក់​ថា៖ “បើ​មិន​បាន​កក់​សំបុត្រ​ទុក​ជាមុន​ទេ​ នៅ​ថ្ងៃ​បុណ្យ​អុំ​ទូក​ខាង​មុខ​នេះ​ គឺ​គ្មាន​បន្ទប់​ស្នាក់​​នៅ​ទេ​ សុទ្ធ​តែ​ភ្ញៀវ​ទាំង​អស់”។

មគ្គុទ្ទេសក៍​ទេសចរណ៍​​នៅ​ខេត្ត​មណ្ឌល​គិរី​នេះ​ លោក​ ប៊ុត​ វណ្ណលាង​ ឲ្យ​ដឹង​ថា​ កន្លែង​កម្សាន្ត​ដែល​ទាក់​ទាញ​ភ្ញៀវ​ទេសចរ​​ទាំង​ខ្មែរ​ និង​បរទេស​ គឺ​មាន​ទឹក​ជ្រោះ​ប៊ូស្រា​ ទឹក​ធ្លាក់​រមនា​ ចម្ការ​កាហ្វេ​ សមុទ្រ​ឈើ​ ភ្នំ​ដោះ​ក្រមុំ​ និង​ភូមិ​ជន​ជាតិ​ដើម​ភាគ​តិច។ នៅ​ពេល​ភ្ញៀវ​ត្រឡប់​ពី​កម្សាន្ត​នៅ​តំបន់​ទាំង​នេះ​វិញ​  គេ​និយម​ទៅ​​ញ៉ាំ​អាហារ​ពេល​ល្ងាច​នៅ​ភោជនីយដ្ឋាន​រមិស​ ដែល​អាច​ទស្សនា​ការ​សម្ដែង​របាំ​ប្រពៃណី​របស់​ជន​ជាតិ​ដើម​ភាគ​តិច​បាន។

លោក​វណ្ណលាង​បញ្ជាក់​ថា៖ “ពេល​ខ្លះ​គេ​ក៏​ជិះ​ដំរី​​ចូល​ក្នុង​ព្រៃ​មើល​ទេសភាព​កម្សាន្ត​លេង​ដែរ​ ដូច្នេះ​ការ​ដើរ​លេង​កម្សាន្ត​របស់​អ្នក​ទេសចរណ៍​ខ្លះ​អាស្រ័យ​លើ​ការ​ កុម្ម៉ង់​របស់​គេ​ដែរ។ គេ​ចង់​ទៅ​កម្សាន្ត​នៅ​ទី​ណា​ យើង​នាំ​ទៅ​កន្លែង​ហ្នឹង”។

នា​ពេល​កន្លង​មក​ ខេត្ត​មណ្ឌល​គិរី​នេះ​ត្រូវ​បាន​គេហទំព័រ​ធ្វើ​ដំណើរ​កម្សាន្ត​ល្បី​លំដាប់​ ពិភព​លោក​ នោះ​គឺ​ Lonely Planet ​សរសើរ​ថា​ជា​ខេត្ត​មាន​ទេសភាព​ស្អាត​ ដោយ​ប្រៀប​ធៀប​ខេត្ត​នេះ​ថា​៖ “នៅ​រដូវ​ប្រាំង​ គឺ​ដូច​ប្រទេស​ Wales ​(ចក្រភព​អង់គ្លេស) ​ដោយ​មាន​ពន្លឺ​ព្រះ​អាទិត្យ​ភ្លឺ​ចិញ្ចែង​ចិញ្ចាច​ ឯ​រដូវ​វស្សា​វិញ​ គឺ​ដូច​​រដ្ឋ​Tasmania ​របស់​ប្រទេស​អូស្ត្រាលី​ ដោយ​មាន​ភ្លៀង​ធ្លាក់​ច្រើន”។

យុវជន​ ចាន់​ ដារា​ អាយុ​២៧​ឆ្នាំ​ ដែល​ធ្លាប់​ទៅ​កម្សាន្ត​នៅ​ខេត្ត​មណ្ឌល​គិរី​នេះ​តាំង​ពី​ឆ្នាំ​២០១១​ ឲ្យ​ដឹង​ថា​ នៅ​ខែ​វិច្ឆិកា​អីចេះ​ ខេត្ត​នេះ​មាន​អាកាសធាតុ​ត្រជាក់​ខ្លាំង​ និង​ចុះ​អព្ភ​ សឹងតែ​ដូច​នៅ​បរទេស​ទៅ​ហើយ។

យុវជន​រូប​នេះ​បញ្ជាក់​ថា៖​ “​ដង​ផ្លូវ​ឆ្ពោះ​ទៅ​សែន​មនោរម្យ​មាន​វាល​ស្មៅ​ខ្ពស់​ទាប​ វែង​អន្លាយ​​ស្រស់​ស្អាត​ណាស់។ ដី​​ពណ៌​ក្រហម​​ ស្អាត​ និង​គ្មាន​ធូលី​​ហុយ​ទេ។ បើ​យើង​ចូល​ចិត្ត​ថត​រូប​ទៀត​ មណ្ឌល​គិរី​នេះ​គឺ​ជា​កន្លែង​ដ៏​ល្អ​បំផុត​ក្នុង​ឱកាស​បុណ្យ​អុំ​ទូក​ខាង​ មុខ​នេះ”៕

អត្ថបទ៖ មាស រ័ត្ន

អត្ថបទ​ដកស្រង់​ទាំងស្រុង​ពី​គេហទំព័រSabay( http://news.sabay.com.kh/articles/505558)

អីយ៉ា! គ្រូ​វិទ្យាល័យ​មក​ពី​ជនបទ​សោះ​ ជាប់​សុទ្ធ​តែ​អាហារូបករណ៍​អាមេរិក

គ្រូ​បង្រៀន​វិទ្យាល័យ​ ឬ​អនុវិទ្យាល័យ​ ជា​ទូទៅ​ ពុំ​សូវ​មាន​ឱកាស​បាន​អភិវឌ្ឍ​ចំណេះ​ដឹង​របស់​ខ្លួន​បន្ថែម​​ ជា​ពិសេស​នៅ​ប្រទេស​ក្រៅ​​តែ​ម្ដង​ ប៉ុន្តែ​ឥឡូវ​នេះ​គ្រូ​បង្រៀន​មួយ​រូប​​មក​ពី​ជន​បទ​សោះ​បាន​បំបែក​នូវ​រនាំង​នេះ។

កញ្ញា​ សួន​ កញ្ញារិន​ អាយុ​២៩​ឆ្នាំ​ ជា​គ្រូ​បង្រៀន​មុខ​វិជ្ជា​ភាសា​អង់គ្លេស​ នៅ​វិទ្យាល័យ​សុខ​ អាន​ព្រៃ​សណ្ដែក​ ខេត្ត​តាកែវ​ បាន​ជាប់​អាហារូបករណ៍​ទៅ​រៀន​រហូត​ដល់​​សហរដ្ឋ​អាមេរិក។ កញ្ញា​ទើប​ត្រឡប់​មក​ពី​សហរដ្ឋ​អាមេរិក​វិញ​នៅ​ប៉ុន្មាន​ថ្ងៃ​នេះ​ទេ។

មាន​ស្រុក​កំណើត​នៅ​ខេត្ត​តាកែវ​ កញ្ញារិន​បាន​ចាប់​ផ្ដើម​អាជីព​ដំបូង​​ជា​គ្រូ​បង្រៀន​អនុវិទ្យាល័យ ​ផ្នែក​អក្សរ​សាស្ត្រ​ខ្មែរ​ ក្នុង​​ឆ្នាំ​២០០២។ កញ្ញា​បាន​រៀន​បន្ត​យក​បរិញ្ញាបត្រ​ពី​សាកលវិទ្យាល័យ​ខេមរៈ​ សាខា​ខេត្ត​តាកែវ​ រយៈ​ពេល​បួន​ឆ្នាំ​ ពី​២០០៤​ ដល់​២០០៨​ រួច​ក៏​បាន​ឡើង​ធ្វើ​ជា​គ្រូ​នៅ​វិទ្យាល័យ​សុខ​ អាន​ព្រៃ​សណ្ដែក​ ដោយ​ប្ដូរ​ឯកទេស​ទៅ​បង្រៀន​ភាសា​អង់គ្លេស។

កញ្ញារិន​បាន​ដាក់​ពាក្យ​ធ្វើ​ជា​អ្នក​​សម្រប​សម្រួល​ផ្នែក​ភាសា​ក្នុង​ កម្មវិធី​ Peace Corps ​របស់​អាមេរិក​ នៅ​ឆ្នាំ​២០១១។ កម្មវិធី​នេះ​គឺ​ផ្ដោត​លើ​ការ​ផ្លាស់​ប្ដូរ​វប្បធម៌​រវាង​កម្ពុជា​ និង​សហរដ្ឋ​អាមេរិក​ ដោយ​ប្រទេស​មហា​អំណាច​មួយ​នេះ​​បាន​បញ្ជូន​យុវជន​របស់​ខ្លួន​មក​រស់​នៅ​ ជាមួយ​នឹង​គ្រួសារ​ខ្មែរ​ ឯ​ប្រទេស​កម្ពុជា។ ទន្ទឹម​នឹង​នោះ​ អាមេរិក​ក៏​បាន​​ប្រកាស​ជ្រើស​រើស​យក​យុវជន​ខ្មែរ​ទៅ​ចូល​រួម​សិក្ខាសាលា​ និង​រស់​នៅ​ជាមួយ​គ្រួសារ​អាមេរិក​ រយៈ​ពេល​ខ្លី​ នៅ​ឯ​ប្រទេស​របស់​ខ្លួន​ដែរ។

គ្រូ​បង្រៀន​រូប​នេះ​និយាយ​ថា៖ “ពេល​ធ្វើការ​ជាមួយ​យុវជន​អាមេរិក​ ដែល​មក​ស្នាក់​នៅ​ជាមួយ​គ្រួសារ​ខ្មែរ​ឯ​ខេត្ត​តាកែវ​នេះ​ដំបូង​ ខ្ញុំ​បារម្ភ​ខ្លះ​ដែរ​ ព្រោះ​ខ្លាច​មិន​អាច​ធ្វើ​ការ​ជាមួយ​ពួក​គេ​បាន។ យើង​បាន​រៀន​ពី​​វប្បធម៌​​គ្នា​ទៅ​វិញ​ទៅ​មក។ គ្មាន​បញ្ហា​អ្វី​កើត​ឡើង​ទេ​ លើក​លែង​តែ​ជន​ជាតិ​អាមេរិក​ខ្លះ​បាន​ធ្លាក់​ខ្លួន​ឈឺ​ ដោយសារ​មិន​អាច​ទទួល​យក​អាហារ​ និង​អាកាសធាតុ​របស់​យើង​បាន​ភ្លាម​ៗ”។

តែ​ទោះ​បី​យ៉ាង​ណា​ កញ្ញារិន​អាច​សម្រប​ធ្វើ​ការ​ជាមួយ​នឹង​ជន​ជាតិ​អាម៉េរិកាំង​ទាំង​នោះ​បាន​ ព្រម​ទាំង​ទទួល​បាន​ផល​ប្រយោជន៍​ជា​ច្រើន​ពី​ការងារ​នេះ​ផង​ដែរ។ កញ្ញា​បាន​បន្ត​ធ្វើការ​ងារ​នេះ​រយៈ​ពេល​បី​ឆ្នាំ​ជាប់​ៗ​​គ្នា​​តែ​ម្ដង​ គឺ​ឆ្នាំ​២០១១​ ឆ្នាំ​២០១២ និង​ឆ្នាំ​២០១៣​ ដែល​ធ្វើ​ឲ្យ​គ្រួសារ​កញ្ញា​សប្បាយ​ចិត្ត​យ៉ាង​ខ្លាំង។

កញ្ញារិន​បញ្ជាក់​ថា៖ “នៅ​ពេល​ធ្វើ​ការ​ជាមួយ​គេ​មួយ​រយៈ​ ខ្ញុំ​មើល​ឃើញ​ខ្លួន​ឯង ​ថា​ចាប់​ផ្ដើម​មាន​ភាព​រីក​ចម្រើន​ ជាពិសេស​ភាសា​អង់គ្លេស​តែម្ដង​ ពី​ព្រោះ​យើង​បាន​សន្ទនា​ផ្ទាល់​ជាមួយ​គ្នា​ញឹក​ញាប់”។

ពេល​កំពុង​ធ្វើ​ការ​ជាមួយ​ជន​បរទេស​ទាំង​នោះ​ គ្រូ​បង្រៀន​រូប​នេះ​ក៏​បាន​ឮ​ព័ត៌មាន​ ជា​ពិសេស​ពី​អ្នក​ដែល​ធ្លាប់​បាន​ជាប់​ទៅ​​សហរដ្ឋ​អាមេរិក​មុន​ៗ​ថា​ អ្នក​សម្រប​សម្រួល​ក៏​​អាច​មាន​ឱកាស​បាន​ទៅ​រៀន​នៅ​ប្រទេស​នេះ​ដែរ។ នៅ​ឆ្នាំ​២០១៣​នេះ​ កញ្ញារិន​ក៏​ចាប់​ផ្ដើម​ធ្វើ​ការ​ស្រាវជ្រាវ​ព័ត៌មាន​ផ្សេង​ៗ ​និង​ឃ្លាំ​មើល​គេហទំព័រ​របស់​ស្ថាន​ទូត​អាមេរិក​យ៉ាង​ដិតដល់​ ព្រម​ទាំង​បង្កើត​បណ្ដាញ​ជា​ច្រើន​ ដើម្បី​ឆក់​យក​ឱកាស​ទៅ​សិក្សា​នៅ​ប្រទេស​នេះ។ ទន្ទឹម​នឹង​នោះ​​​ ជនជាតិ​អាមេរិក​ដែល​ធ្វើ​ការ​​ជាមួយ​កញ្ញារិន​ក៏​បាន​ជួយ​សម្រួល​ដល់​គ្រូ​ បង្រៀន​រូប​នេះ​ផង​ដែរ។

ជា​ដំណឹង​ល្អ ​កញ្ញារិន​ក៏​បាន​ជាប់​អាហារូបករណ៍​មួយ ​ TEA Program ឬ ​Teaching Excellent and Achievement ទៅ​ចូល​រួម​សិក្ខាសាលា​វគ្គ​ខ្លី​រយៈពេល​មួយ​ខែ​កន្លះ​ ជាមួយ​នឹង​បេក្ខជន​១០៥​នាក់​ មក​ពី​ប្រទេស​ចំនួន​៣៥​​ ឯ​សហរដ្ឋ​អាមេរិក។

ប៉ុន្តែ​នៅ​ពេល​សរសេរ​ពាក្យ​សុំ​អាហារូបករណ៍​នេះ​ កញ្ញា​ស្ទើរ​តែ​បោះ​បង់​ចោល​បំណង​ប្រាថ្នា​នោះ​​ ដោយសារ​បញ្ហា​ភាសា​អង់គ្លេស​ផង​ និង​តម្រូវ​ការ​នៃ​ពាក្យ​ស្នើ​សុំ​នោះ​ផង។ គេ​ទាម​ទា​ឲ្យ​គ្រូ​វិទ្យាល័យ​រូប​នេះ​មាន​ពិន្ទុ​ភាសា​អង់គ្លេស​TOEFL​ ៤៥០​។ ទោះបី​យ៉ាងណា ​គ្រូ​បង្រៀន​វិទ្យាល័យ​រូប​នេះ​​អាច​មាន​សមត្ថភាព​រក​ពិន្ទុ​នេះ​បាន​យ៉ាង​ ស្រួល។

កញ្ញាវិន​បញ្ជាក់​ថា៖ “ពាក្យ​ស្នើ​សុំ​មាន​ច្រើន​ទំព័រ​ពេក​ ចន្លោះ​ពី​៣០​ទៅ​៤០​ទំព័រ​ឯណោះ​ ដូច្នេះ​​​ខ្ញុំ​ត្រូវ​អាន​មួយ​ទំព័រ​ៗ​យ៉ាង​ប្រយ័ត្ន​ប្រយែង​បំផុត​ រហូត​ដល់​យល់។ ដោយសារ​ការ​ខិត​ខំ​ប្រឹង​ប្រែង​នេះ​ ខ្ញុំ​ក៏​ជាប់​ដោយ​ជោគជ័យ​ទៅ”។

គ្រូ​វិទ្យាល័យ​រូប​នេះ​បាន​ចាក​ចេញ​ទៅ​កាន់​សហរដ្ឋអាមេរិក​នៅ​ថ្ងៃ​ទី​ ១៦​ ខែ​កញ្ញា​ ដោយ​ដំបូង​បាន​ទៅ​កាន់​រដ្ឋ​ Montana​ រួច​បន្ត​ទៅ​ទី​ក្រុង​Washington មុន​នឹង​ត្រឡប់​មក​កម្ពុជា​វិញ។

កញ្ញា​ឲ្យ​ដឹង​បន្ថែម​ថា៖ “អ្វី​ៗ​គឺ​អស្ចារ្យ​តែ​ម្ដង! ការ​រស់​នៅ​ អគារ​ និង​អ្វី​ៗ​ផ្សេង​ទៀត​សុទ្ធ​តែ​ទំនើប។ បើ​ការ​អប់រំ​នៅ​សាលា​គេ​ទៀត​ គឺ​មិន​បាច់​និយាយ​ទេ។ គេ​មាន​ថ្នាក់​តន្ត្រី​ កីឡា​ និង​បន្ទប់​ពិសោធន៍​ ចំណែក​យើង​មិន​ទាន់​មាន​នៅ​ឡើយ​ទេ។ ខ្ញុំ​គិត​ថា​ យើង​ដើរ​យឺត​ជាង​គេ​យ៉ាង​ហោច​ណាស់​ក៏​២០​ឆ្នាំ​ដែរ”។

នៅ​ទី​នោះ​ កញ្ញារិន​បាន​សិក្សា​វិធី​សាស្ត្រ​នៃ​ការ​បង្រៀន​ផ្សេង​ៗ​ និង​របៀប​ធ្វើ​ការងារ​ជា​ក្រុម​ជា​ច្រើន។ លើស​ពី​នេះ​ កញ្ញា​ក៏​បាន​ទៅ​រស់​នៅ​ជាមួយ​នឹង​គ្រួសារ​អាមេរិក​មួយ​ បាន​ចំនួន​ប៉ុន្មាន​ថ្ងៃ​ដែរ​ ដើម្បី​ស្វែង​យល់​ពី​វប្បធម៌​នៃ​ការ​រស់​នៅ​ផ្ទាល់​របស់​គេ។

ក្រៅពី​ការ​ចូលរួម​ចែក​រំលែក​បទពិសោធន៍ និង​វប្បធម៌​កម្ពុជា​ដល់​សិស្ស​និស្សិត​នៅ​ទី​នោះ កញ្ញា​បាន​បញ្ជាក់​ឲ្យ​ដឹង​ថា​ ខ្លួន​ក៏​មាន​ឱកាស​បាន​ទៅ​ទស្សនា​​​តំបន់​រមណីយដ្ឋាន​មួយ​ចំនួន​នៅ​ទី​នោះ ជាមួយ​នឹង​គ្រូបង្រៀន​ដែល​បាន​ជាប់​អាហារូបករណ៍​នេះ​ទៅ​ជាមួយ​គ្នា​ដែរ។ “វា​ជា​សំណាង ​ជា​បទពិសោធន៍​​ដ៏​ល្អ​ និង​ជា​អនុស្សាវរីយ៍​​​មិន​អាច​បំភ្លេច​បាន​ក្នុង​ជីវិត​របស់​ខ្ញុំ”។

កញ្ញា​​ចង់​ឲ្យ​គ្រូបង្រៀន​ឯ​ទៀត​ខិតខំ​ពង្រឹង​សមត្ថភាព​របស់​​ខ្លួន​ដើម្បី​ចាប់​យក​ឱកាស​ល្អៗ​ទាំង​នេះ។​

កញ្ញារិន​បញ្ជាក់​ថា៖ “បើ​ទោះ​បី​យើង​ជា​​គ្រូ​បង្រៀន​វិទ្យាល័យ​ កុំ​ទាន់​អស់​សង្ឃឹម​ ព្រោះ​គ្រូ​វិទ្យាល័យ​ក៏​អាច​មាន​ឱកាស​បាន​ទៅ​លេង​នៅ​អាមេរិក​ដែរ”៕

ចុច​ត្រង់​នេះដើម្បី​អាន​អត្ថបទ “និស្សិត​ខ្មែរ​​សិក្សា​នៅ​​អាមេរិក ​ប្រាប់​ពី​ល្បិច​សុំ​​​អាហារូបករណ៍​​​​បរទេស”។

 

ដកស្រង់​ទាំង​ស្រុង​ពីគេហទំព័រ​Sabay (http://news.sabay.com.kh/articles/507992)

ក្លាយ​ជា​ប្រធាន​ក្រុមហ៊ុន​ក្មេង​បំផុត​ក្នុង​ស្រុក​ខ្មែរ​ មាន​ចំណូល​មិន​គួរ​ឲ្យ​ជឿ

មាន​​វ័យ​ទើប​តែ​២២​ឆ្នាំ​សោះ​ យុវជន​សាំង​ តារា​រស្មី​ ធ្លាប់​បាន​ប្រលូក​ក្នុង​ការងារ​ ហើយ​រក​ចំណូល​ដោយ​​ខ្លួន​ឯង​អស់​រយៈពេល​៧​ឆ្នាំ​មក​ហើយ។​ នា​ពេល​បច្ចុប្បន្ន​នេះ​ យុវជន​វ័យ​ក្មេង​បាន​ក្លាយ​ជា​នាយក​ប្រតិបត្តិ​​ក្រុម​ហ៊ុន​​មួយ​នៅ​ស្រុក​ខ្មែរ​ ដែល​មាន​វ័យ​ក្មេង​បំផុត​ ជាមួយ​នឹង​ប្រាក់​ចំណូល​១​ម៉ឺន​ដុល្លារ​ក្នុង​មួយ​ខែ។

តើ​យុវជន​​សាំង​ តារារស្មី​​មាន​ដំណើរ​ជីវិត​បែប​ណា​ ទើប​បាន​ជា​ជោគជ័យ​ក្នុង​​ជីវិត​លឿន​​បែប​នេះ?

លោក​​សាំង​ តារា​រស្មី​​កើត​ថ្ងៃ​ទី​២២ ​ខែ​កុម្ភៈ​ ឆ្នាំ​១៩៩១ ​នៅ​រាជធានី​ភ្នំពេញ​ មាន​បង​ប្អូន​៤​នាក់​ ដោយ​យុវជន​រូប​នេះ​ជា​​កូន​ពៅ​ក្នុង​គ្រួសារ​​មួយ​ ដែល​មាន​ជីវភាព​មធ្យម។

កុមារភាព
កុមារា​សាំង​ តារារស្មី​បាន​ចូល​រៀន​នៅ​សាលា​បឋម​សិក្សា​បាក់​ទូក​ ក្នុង​​ឆ្នាំ​១៩៩៦។ កាល​នៅ​រៀន​សាលា​បឋម​សិក្សា​​បាក់​ទូក​ ថ្នាក់​ទី​៤​ និង​ទី​៥​ គេ​មិន​ទាន់​ចេះ​គិត​គូរ​អ្វី​វែង​ឆ្ងាយ​ឡើយ​ ដោយសារ​នៅ​ក្មេង​ពេក​ អីចឹង​ហើយ​កុមារ​រូប​នេះ​ក៏​ដូច​ជា​សិស្ស​មួយ​ចំនួន​ផ្សេង​ទៀត​ដែរ​ តែង​លួច​ដើរ​លេង​ គេច​សាលា​ម្ដង​ម្កាល។ ប៉ុន្តែ​ចូល​មក​ដល់​ថ្នាក់​ទី​៦​ តារា​រស្មី​បែរ​ជា​ប្ដូរ​អត្តចរិត​​មិន​ល្អ​ទាំង​នោះ​ចោល ​មក​ផ្ដោត​​លើ​ការ​សិក្សា​វិញ។ ទាំង​នេះ​គឺ​ដោយ​សារ​​តែ​ការ​តាំង​ចិត្ត​ និង​យក​គំរូ​តាម​មនុស្ស​ម្នាក់​ដែលខ្លូន​​កំណត់​ផ្លូវ​ដើរ​តាម។

យក​បង​ប្រុស​ដែល​ជា​សិស្ស​ពូកែ​ធ្វើ​ជា​គំរូ​
ស្ថិត​ក្នុង​វ័យ​ជា​កុមារ​ភាព​ តារា​រស្មី​​គ្រាន់​តែ​ជា​ក្មេង​ធម្មតា​ម្នាក់​តែ​ប៉ុណ្ណោះ​ ប៉ុន្តែ​ជីវិត​​គេ​ចាប់​ផ្ដើម​​មាន​គោល​ដៅ​ច្បាស់​លាស់​ ​​ដោយ​សារ​តែ​កុមារា​រូប​នេះ​បាន​ចាប់​យក​បង​ប្រុស​បង្កើត​របស់​ខ្លួន​ធ្វើ​ ជា​មនុស្ស​គំរូ​ ខណៈ​ពេល​ដែល​បង​ប្រុស​គាត់​ជា​សិស្ស​ពូកែ​ប្រចាំ​សាលា​ម្នាក់​ដែរ​ គឺ​សាលា​វិទ្យាល័យ​បាក់​ទូក។  ដោយ​សារ​តែ​ស្រលាញ់​ការ​សិក្សា​ រស្មី​បាន​ចាប់​ផ្ដើម​ខិត​ខំ​រៀន​សូត្រ​ តាំង​ពី​ថ្នាក់​ទី​៧​មក។​ កាល​នៅ​រៀន​ មុខវិជ្ជា​ដែល​រស្មី​ចូល​ចិត្ត​​ និង​រៀន​ពូកែ​ជាង​គេ​ គឺ​គណិត​ និង​រូប​វិទ្យា។​ តារារស្មី​​បាន​ជក់​ចិត្ត​យ៉ាង​ខ្លាំង​ក្នុង​ការ​ស្រាវ​ជ្រាវ​​លើ​មុខ​ វិជ្ជា​ទាំង​ពីរ​នេះ។

គ្រូ​ចង់​ដេញ​ចេញ​ពី​ថ្នាក់​ ដោយ​សារ​តែ​សួរ​ និង​ឆ្ងល់​ច្រើន​ពេក
រំឭក​ដល់​រឿង​នេះ​ តារារស្មី​​បាន​សើច​ញញឹម​ រួច​និយាយ​​​ថា ​កាល​ហ្នឹង​ខ្ញុំ​រៀន​​ត្រឹម​ថ្នាក់​ទី​៧​ទេ​ តែ​ដោយ​សារ​តែ​មហិច្ឆតា​ និង​ចាប់​អារម្មណ៍​យ៉ាង​ងប់ងុល​ជា​មួយ​នឹង​មុខ​វិជ្ជា​គណិតវិទ្យា​ខ្លាំង​ ពេក​​ គេ​​ក៏​បាន​ចូល​រៀន​គួរ​ថ្នាក់​ទី​៩។ ​ដោយ​សារ​តែ​ការ​ចាប់​​យក​ការ​ពន្យល់​ពី​គ្រូ​នៅ​មាន​កម្រិត​ ព្រោះ​ខ្លួន​ទើប​តែ​រៀន​ថ្នាក់​ទី​៧​ តែ​ចូល​រៀន​គួរ​ជា​មួយ​សិស្ស​ថ្នាក់​ទី​៩​ ទើប​ធ្វើ​ឲ្យ​​យុវជន​រូប​នេះ​ឆ្ងល់​ និង​ត្រូវ​សួរ​ច្រើន​ជាង​សិស្ស​ដទៃ​ទៀត​ក្នុង​ថ្នាក់​រៀន​គួរ​នោះ។ ការ​ឆ្ងល់​ និងការ​​សួរ​ច្រើន​ដង​ពេក​បាន​​ធ្វើ​ឲ្យ​គ្រូ​ខឹង​មួម៉ៅ​ក្រពុល​មុខ​ ព្រោះ​មិន​ដែល​មាន​សិស្ស​ណា​រៀន​ត្រឹម​ថ្នាក់​ទី​៧​ ហើយ​ហ៊ាន​មក​រៀន​គួរ​ថ្នាក់​ទី​៩​ ដូច​​តារា​រស្មី​​​បែប​ហ្នឹង​ទេ។

តូច​តែ​ខ្លឹម​ គ្រូ​គណិតវិទ្យា​អាយុ​ត្រឹម​តែ​១៥​ឆ្នាំ
ទោះ​បី​មាន​វ័យ​ទើប​តែ​១៥​ឆ្នាំ​ក៏​ពិត​មែន​ ប៉ុន្តែ​ចំណេះ​ដឹង​លើ​មុខ​វិជ្ជា​គណិតវិទ្យា​របស់​យុវជន​រូប​នេះ​​អាច​រក​ ចំណូល​​បាន។ ​តារារស្មី​បាន​ខិត​ខំ​ពុះ​ពារ​ជិះ​កង់​ដើរ​បង្រៀន​គួរ​គណិតវិទ្យា​តាម​ផ្ទះ ​ ដោយ​ទទួល​បាន​ប្រាក់​កម្រៃ​ត្រឹម​​តែ​២៥​ដុល្លារ​​​ក្នុង​មួយ​ខែ​នា​ពេល​នោះ ​​​ ប៉ុន្តែ​គិត​មក​ដល់​បច្ចុប្បន្ន​ ប្រាក់​​២៥​ដុល្លារ​​​យុវជន​រូប​នេះ​អាច​រក​បាន​ពី​ការ​បង្រៀន​តែ​ក្នុង​មួយ ​ម៉ោង​ប៉ុណ្ណោះ។

តារា​រស្មី​បាន​ឲ្យ​ដឹង​ថា​៖ “ខ្ញុំ​ចេញ​បង្រៀន​គេ​រក​លុយ​ចាយ​ដោយ​ខ្លួន​ឯង​តាំង​ពី​ថ្នាក់​ទី​១០​មក​ ម្ល៉េះ។ ​ដោយ​សារ​តែ​ទឹក​ចិត្ត​ស្រលាញ់​ និង​​មាន​​សមត្ថភាព​បង្រៀន​​​គណិតវិទ្យា​ច្បាស់​លាស់​​ ទើប​ខ្ញុំ​ត្រូវ​​បាន​​គេ​ជួល​ឲ្យ​ទៅ​បង្រៀន​គួរ​គេ​ជា​ហូរហែ​ ខណៈ​ដែល​មាន​អាយុ​ត្រឹម​តែ​១៥​ឆ្នាំ​ប៉ុណ្ណោះ”។

​ចេះ​ប្រាកដ​ប្រាក់​រត់​តាម​ហៅ​ពិត​​មែន
ឆ្លង​កាត់​បទ​បទពិសោធន៍​បង្រៀន​ ចំណេះ​ដឹង​របស់​តារារស្មី​ក៏​កាន់​តែ​កើន​ឡើង ហើយ​ប្រាក់​ចំណូល​ក៏​រក​បាន​ក្រាស់ក្រែល​ដែរ។ ក្នុង​មួយ​ខែ​ៗ​ គ្រាន់​តែ​ដើរ​បង្រៀន​គួរ​ អាច​រក​បាន​ជិត​១០០០​ដុល្លារ​​ ព្រោះ​ការ​បង្រៀន​ក្នុង​មួយ​ម៉ោង​បាន​ថ្លៃ​រហូត​ដល់​២៨​ដុល្លារ​ឯណោះ។ តារារស្មី​យល់​ថា​ នេះ​ពិត​ជា​មោទនភាព​​​មួយ​ ពី​ព្រោះ​ខ្លួន​រៀន​មិន​ទាន់​ចប់​បាក់​ឌុប​ផង​ រក​ចំណូល​បាន​ខ្ពស់​បែប​នេះ។

លើស​ពី​នេះ​ទៀត​នោះ​ តារា​រស្មី​បាន​ខិត​ខំ​ចងក្រង​ឯកសារ​​ រូប​មន្ត​ ក៏​​ដូច​ជា​គន្លឹះ​សំខាន់ៗ​ ទាក់​ទង​នឹង​មុខ​វិជ្ជា​​គណិតវិទ្យា​នេះ​ តាំង​ពី​ថ្នាក់​ទី​១០​មក​ម្ល៉េះ​ ព្រោះ​តារា​រស្មី​ដឹង​ច្បាស់​ថា​ ថ្ងៃ​ណា​មួយ​ រូប​គេ​នឹង​រៀប​រៀង​ចង​ក្រង​ជា​​សៀវភៅ​ដោយ​ខ្លួន​ឯង​មិន​ខាន។ គិត​មក​ដល់​ពេល​នេះ​ សៀវភៅ​លំហាត់​គណិតវិទ្យា​ដែល​តារារស្មី​​សរសេរ​​សរុប​បាន​៦​ក្បាល​ហើយ​ ហើយ​កំពុង​ដាក់​​លក់​នៅ​​លើ​ទី​ផ្សារ​ ដោយ​ទទួល​បាន​​ការ​គាំទ្រ​ទាំង​សិស្ស​ ទាំង​គ្រូ​ ដែល​អាច​ផ្ដល់​ប្រាក់​កម្រៃ​ក្រាស់ក្រែល​ដែរ​មក​ដល់​ពេល​នេះ។

ទាក់​ទង​នឹង​ប្រវត្តិ​នៃ​ការ​បោះ​ពុម្ព​សៀវភៅ​ដែល​ជា​ស្នាដៃ​ដំបូង​ យុវជន​រូប​នេះ​បាន​រៀប​រាប់​ថា​៖ “ខ្ញុំ​សម្រេច​ចិត្ត​បោះពុម្ព​សៀវភៅ​គណិតវិទ្យា​ដោយ​ខ្លួន​ឯង​ តែ​​កាល​ហ្នឹង​ខ្ញុំ​គ្មាន​លុយ​គ្រប់​គ្រាន់​ទេ​ តែ​ដោយ​សារ​តែ​កូន​សិស្ស​ដែល​ខ្ញុំ​បង្រៀន​មាន​បើក​រោង​បោះ​ពុម្ព​ ទើប​គេ​ឲ្យ​ខ្ញុំ​បង់​រំលោះ​បន្តិច​ម្ដងៗ។ ​ក្រោយ​ពី​ចេញ​ជា​សៀវភៅ​ហើយ​ ខ្ញុំ​ត្រូវ​យក​សៀវភៅ​ទាំង​នោះ​ទៅ​ដាក់​តាម​កន្លែង​លក់​សៀវភៅ​ តាម​ផ្សារ​ បណ្ណាគារ​ ឬ​ដាក់​តុ​​អង្គុយ​លក់​​​ដោយ​​​ខ្លួន​ឯង​ទៀត​ផង។​ ដោយ​សារ​តែ​មិន​សូវ​មាន​អ្នក​ស្គាល់​ ហើយ​ខ្ញុំ​មិន​មែន​ជា​អ្នក​រៀប​រៀង​ល្បី​ផង​នោះ​ ពេល​ខ្លះ​ត្រូវ​សុំ​អង្វរ​ឲ្យ​គេ​ជួយ​ទទួល​លក់​តាម​កន្លែង​លក់​សៀវភៅ​ ទោះ​បី​ពេល​ខ្លះ​ត្រូវ​​គេ​បដិសេធ​ក៏​ដោយ”។

ជើង​ខ្លាំង​ខាង​សិក្សា​វ័យ​ក្មេង​
ខណៈ​ពេល​ដែល​ខ្លួន​ទើប​តែ​រៀន​ត្រឹម​តែ​ថ្នាក់​​ទី​៩​ប៉ុណ្ណោះ​ តារារស្មី​បាន​រៀន​បញ្ចប់​សាលា​ចិន​ថ្នាក់​ទី​១២​បាត់​ទៅ​ហើយ។ មិន​ត្រឹម​តែ​ប៉ុណ្ណោះ​ ពេល​​ប្រលង​ជាប់​ចូល​មក​ដល់​ថ្នាក់​ទី​១០​ យុវសិស្ស​រូប​នេះ​បាន​បញ្ចប់​សាលា​ភាសា​នៅ​មជ្ឈមណ្ឌល​អូស្ត្រាលី​​សម្រាប់​​ ការ​បណ្ដុះ​បណ្ដាល​ (ACE)។ នៅ​​ឆ្នាំ​២០០៨​ តារារស្មី​​បាន​ប្រលង​ជាប់​បាក់​ឌុប​ បន្ទាប់​មក​ដោយ​សារ​ចង់​វាស់​ស្ទង់​ពី​សមត្ថភាព​របស់​ខ្លួន​ក៏​បាន​ដាក់​ ពាក្យ​ប្រលង​តាម​សាកលវិទ្យាល័យ។​ ជា​លទ្ធផល​ សិស្ស​ពូកែ​រូប​នេះ​បាន​ប្រលង​ជាប់​អាហារូបករណ៍​៨​កន្លែង​ពី​សាកល​វិទ្យាល័យ ​ក្នុង​រាជធានី​ភ្នំពេញ​ ដែល​ខ្លួន​បាន​ដាក់​ពាក្យ ​ស្ទើរ​មិន​គួរ​ឲ្យ​ជឿ។

ខ្លាំង​នៅ​ខ្មែរ​ តែ​ខ្សោយ​នៅ​អេស្ប៉ាញ ​ មាន​មហិច្ឆតា​បង្រៀន​កូន​ខ្មែរ​ជំនាន់​ក្រោយ​ឲ្យ​ខ្លាំង​ជាង​ខ្លួន

មុន​ប្រលង​បាក់​ឌុប​ តារារស្មី​បាន​​ចេញ​ទៅ​ប្រលង​សិស្ស​ពូកែ​​គណិតវិទ្យា​ទូទាំង​ពិភពលោក​​​នៅ​ ប្រទេស​អេស្ប៉ាញ​ ព្រោះ​យុវជន​រូប​នេះ​ជា​សិស្ស​ពូកែ​គណិតវិទ្យា​ថ្នាក់​ជាតិ​​ ប៉ុន្តែ​​ជា​លទ្ធផល​មិន​បាន​ជាប់​ទេ​ ព្រោះ​មាន​សិស្ស​ពូកែ​ ច្រើន​ណាស់​បាន​ចូលរួម។ ដោយ​សារ​តែ​​ខ្លួន​បរាជ័យ​ក្នុង​ការ​ប្រលង​ ទើប​ជំរុញ​ឲ្យ​យុវជន​រូប​នេះ​មាន​ឆន្ទៈ​ក្នុង​ការ​បង្កើត​ជា​សមាគម​ គណិតវិទ្យា​នៃ​កម្ពុជា​​​តូច​មួយ នៅ​ក្នុង​វិទ្យាល័យ​បាក់​ទូក​​ជាមួយ​នឹង​មិត្តភ័ក្ដិ​ ក្នុង​គោល​បំណង​ប្រមូល​ផ្ដុំ​សិស្ស​ពូកែ​ ហើយ​ចែក​រំលែក​ចំណេះ​ដឹង​ ក៏​ដូច​ជា​ជួយ​បង្រៀន​​ដល់​សិស្ស​ជំនាន់​ក្រោយ​ ដើម្បី​ពង្រឹង​​ចំណុច​ខ្សោយ​ដែល​នៅ​ខ្វះ​ខាត​ ថែម​ទាំង​បើក​បង្រៀន​សិស្ស​ដោយ​មិន​យក​លុយ​ទៀត​ផង​។

បទពិសោធន៍​ការងារ ​ និង​បច្ចុប្បន្ន​ភាព
តារារស្មី​បាន​ចាប់​បង្រៀន​គួរ​គណិតវិទ្យា​ដល់​សិស្ស​តាំង​ពី​ថ្នាក់​ទី​​ ១០។​ ពេល​ចូល​ដល់​ថ្នាក់​ទី​១១​ គេ​ធ្វើ​ជា​អ្នក​បក​ប្រែ​ភាសា​អង់គ្លេស​នៅ​តាម​កម្មវិធី​ផ្សេង​ៗ។ ​តារារស្មី​​ក៏​មាន​ពេល​ទៅ​រៀន​ជំនាញ​វគ្គ​ខ្លី​ៗ​ជា​ច្រើន​ទៀត​​ ដូច​ជា​រៀន​និពន្ធ​បទ​ភ្លេង​ តែង​រឿង​ និង​រៀន​ឌីហ្សាញ​ ហើយ​ក្រោយ​មក​ទៀត​បាន​ធ្វើ​ជា​អ្នក​សរសេរ​អត្ថបទ​ឲ្យ​ទស្សនាវដ្ដី​មួយ។ តារា​រស្មី​​ក៏​ធ្លាប់​ធ្វើ​ការ​ងារ​ក្នុង​អង្គការ​ IRI​ និង​​ទូរទស្សន៍​ CTN ​ផង​ដែរ។

ការ​ងារ​ត្រូវ​បាន​ផ្លាស់​ប្ដូរ​ជា​បន្តបន្ទាប់​រហូត​ទៅ​​​ធ្វើ​ជា​​ ជំនួយ​ការ​នាយក​​​នៅ​​សាលា​ ELT​ ដោយ​កាន់​ការងារ​ និង​តួនាទី​ច្រើន​គួរសម​នៅ​ទី​នោះ។ ដូរ​ពី​ការ​ងារ​ជា​ជំនួយ​ការ​ តារារស្មី​​បាន​ទៅ​​ធ្វើ​ការងារ​ជា​បុគ្គលិក​ក្រុម​ហ៊ុន​ Askap Gold Investment Co Ltd. ដែល​ជា​ក្រុមហ៊ុន​​ផ្ដល់​ប្រឹក្សា​ខាង​ជួញ​ដូរ​មាស​អន្តរជាតិ។ គ្រាន់​តែ​ពីរ​ខែ​ប៉ុណ្ណោះ​​ តារារស្មី​ត្រូវ​បាន​គេ​ដំឡើង​ឲ្យ​ធ្វើ​ជា​អ្នក​គ្រប់​គ្រង​ប្រចាំ​ក្រុម​ហ៊ុន។ តាម​រយៈ​បទ​ពិសោធន៍​យ៉ាង​ច្រើន​ក្រាស់ក្រែល​ដែរ​​ យុវជន​រូប​នេះ​បាន​ឈប់​ពី​ក្រុមហ៊ុន​ខាង​លើ​ រួច​សម្រេច​ចិត្ត​បើក​ក្រុម​ហ៊ុន​ដោយ​ខ្លួន​ឯង​ ឈ្មោះ ហេលស៍​ថាម​ ដែល​ជា​ក្រុម​ហ៊ុន​បោះ​ពុម្ព​ផ្សាយ​ទស្សនាវដ្ដី​ហេលស៍​ថាម​​​ ក្នុង​តួនាទី​ជា​នាយក​ប្រតិបត្តិ​​ផ្ទាល់​ប្រចាំ​ក្រុម​ហ៊ុន​តែ​ម្ដង។ តារារស្មី​បាន​បញ្ជាក់​ថា​៖ “សព្វ​ថ្ងៃ​ ចំណូល​ប្រចាំ​ខែ​របស់​ខ្ញុំ​ប្រហែល​​១​ម៉ឺន​ដុល្លារ​ ក្នុង​នោះ​​​ប្រភព​ចំណូល​បាន​មក​ពី​ការ​បង្រៀន​ ​ការ​លក់​សៀវភៅ និង​​ចំណូល​ពី​​ក្រុម​​ហ៊ុន”។

យុវជន​គួរ​តែ​ឈរ​លើ​កត្តា​បី​ដើម្បី​ជីវិត​ទទួល​បាន​ជោគ​ជ័យ​
ទី​មួយ​ គឺ​ត្រូវ​មាន​ផែន​ការ​ប្រចាំ​ជីវិត​ច្បាស់​លាស់​ នោះ​ទើប​អាច​ដើរ​ទៅ​ដល់​គោល​បំណង​ដែល​ខ្លួន​ចង់​បាន។​ មាន​តែ​ខ្លួន​យើង​ផ្ទាល់​ទេ​ទើប​ដឹង​ថា​ ខ្លួន​យើង​ចង់​បាន​អ្វី​ ហើយ​ដើម្បី​ចង់​សម្រេច​មហិច្ឆតា​នោះ​ ត្រូវ​ព្យាយាម​ធ្វើ​ឲ្យ​បាន។​

ទី​​ពីរ​ ត្រូវ​រក​បុគ្គល​ណា​ម្នាក់​ដែល​ជា​បុគ្គល​ឆ្នើម​មក​ធ្វើ​ជា​​មនុស្ស​​គំរូ​ របស់​ខ្លួន។ កាល​ណា​យើង​មាន​នរណា​ម្នាក់​ដែល​ខ្លាំង​ ហើយ​អាច​ទទួល​ជោគជ័យ​ក្នុង​ជីវិត ​យើង​នឹង​អាច​ដើរ​តាម​ផ្លូវ​មួយ​ដែល​ល្អ​ដូច​គាត់​បាន។ តារា​រស្មី​​បាន​សម្រេច​ចិត្ត​យក​បង​ប្រុស​របស់​លោក​មក​ធ្វើ​ជា​គំរូ​ ព្រោះ​បង​ប្រុស​របស់​លោក​ធ្លាប់​​ជា​សិស្ស​​ឆ្នើម​ប្រចាំ​សាលា​ម្នាក់​ដែរ​ ទើប​លោក​រៀន​ពូកែ​​ដូច​សព្វ​ថ្ងៃ​នេះ។

ទី​បី​ យុវជន​គ្រប់​រូប​ត្រូវ​ហ៊ាន​ប្រឈម​មុខ​ចំពោះ​បញ្ហា​ និង​ទទួល​ស្គាល់​ការ​ពិត។ បុគ្គល​មួយ​ចំនួន​ខឹង​ច្រឡោត​​ និង​ប្រតិកម្ម​តប​ទៅ​វិញ​ភ្លាម​​ នៅ​ពេល​ដែល​ឮ​គេ​និយាយ​ពី​ចំណុច​ខ្សោយ​ ឬ​ចំណុច​មិន​ល្អ​របស់​ខ្លួន​ តែ​សម្រាប់​លោក​វិញ​មិន​ដែល​គិត​ដូច្នោះ​ទេ។​ ផ្ទុយ​ទៅ​វិញ​លោក​កាន់​តែ​ខិត​ខំ​កែ​តម្រូវ​ចំណុច​ខ្វះ​ខាត​ទាំង​នោះ​ឲ្យ​ បាន​ល្អ​ប្រសើរ៕

អត្ថបទ៖ យិន សំបូរ

ដកស្រង់​ពី Sabay.com

អាហារូបករណ៍​បរទេស​ល្បី​ៗ​ទាំង​៧ដែលសិស្ស​និសិ្សត​ខ្មែរ​មិន​គួរ​​មើល​រំលង

ជា​រៀង​រាល់​ឆ្នាំ​ សិស្ស​និស្សិត​ខ្មែរ​ត្រូវ​បាន​ផ្ដល់​ឱកាស​ទទួល​បាន​អាហារូបករណ៍​សិក្សា​ លំដាប់​អន្តរជាតិ​​ពី​​បណ្ដា​​​ប្រទេស​​នានា។ ពេល​នេះ​ Sabayសូម​បង្ហាញ​ពី​អាហារូបករណ៍​ល្បី​ៗ​ចំនួន​៧​​ដែល​សិស្ស​និស្សិត​ខ្មែរ​ ភាគ​ច្រើន​ប្រាថ្នា​យក​ឲ្យ​បាន។

១.​អាហារូបករណ៍​Fulbright

​Fulbright គឺ​ជា​អាហារូបករណ៍​ដែល​ផ្ដល់​ដោយ​សហរដ្ឋ​អាមេរិក។ គោល​បំណង​សំខាន់​របស់​អាហារូបករណ៍​នេះ​គឺ​ផ្ដោត​លើ​ការ​ផ្លាស់​ប្ដូរ​វិស័យ​ អប់រំ​ ដើម្បី​ពង្រឹង​សក្ដានុពល​ភាព​ការ​សិក្សា​ដល់ ​សិស្ស​និស្សិត​ជុំ​វិញ​ពិភព​លោក​ និង​ផ្ដល់​នូវ​ឱកាស​សិក្សា​កម្រិត​អន្តរ​ជាតិ​ដល់​សិស្ស​ទូទាំង​ពិភព​លោក​​ ទៅ​សិក្សា​នៅ​ប្រទេស​មហា​អំណាច​នេះ។
ព័ត៌មាន​លម្អិត​ សូម​ចុច​ត្រង់​នេះ

២.​អាហារូបករណ៍​CHEVENING
រាល់​ឆ្នាំ​ សិស្ស​អន្តរ​ជាតិ​មិន​តិច​ជាង​៦០០​នាក់​ទេ​ដែល​ទទួល​បាន​អាហារូបករណ៍CHEVENING​​ពី​រដ្ឋាភិបាល​អង់គ្លេស​ ។ អ្នក​ដែល​ទទួល​បាន​អាហារូបករណ៍​នេះ​នឹង​ជ្រួត​ជ្រាប​ទាំង​ចំណេះ​ដឹង​លក្ខណៈ​ ស្តង់ដារ ភាព​ជា​អ្នក​ដឹក​នាំ និង​សមត្ថភាព​ដោះ​ស្រាយ​បញ្ហា​នានា​ប្រកប​ដោយ​ផល​វិជ្ជមាន។
ព័ត៌មាន​លម្អិត​ សូម​ចុច​ត្រង់​នេះ

៣.​អាហារូបករណ៍​MELBOURN
វា​គឺ​ជា​អាហារូបករណ៍​ដែល​ផ្ដល់​ដោយ​សាកលវិទ្យាល័យMELBOURN ​របស់​ប្រទេស​អូស្ត្រាលី។ ​សាកល​វិទ្យាល័យ​ដ៏​ល្បី​ល្បាញ​នេះ​បើក​ថ្នាក់​អាហារូបករណ៍​បរិញ្ញាបត្រ​ វគ្គ​សិក្សា​ខ្លី និង​ថ្នាក់​អនុ​បណ្ឌិត។ ម្យ៉ាង​វិញ​ទៀត​ភាគី​អូស្ត្រាលី​ជា​អ្នក​ធានា​រ៉ាប់រង​រាល់​ការ​ចំណាយ​ ផ្សេងៗ​កំឡុង​ពេល​សិក្សា​ទៀត​ផង។
ព័ត៌មាន​លម្អិត​ សូម​ចុច​ត្រង់​នេះ

៤.​អាហារូបករណ៍​Eiffel

អ្នក​ដែល​ប្រាថ្នា​ទៅ​សិក្សា​នៅ​ប្រទេស​បារាំង​មិន​ដែល​ខក​ខាន​ស៊ើប​រក​ ព័ត៌មាន​អាហារូបករណ៍​នេះ​ទេ។​ យ៉ាង​ណា​មិញ​ ក្រសួង​ការ​បរទេស​បារាំង​ជា​អ្នក​ឧបត្ថម្ភ​អាហារូបករណ៍​នេះ ហើយ​ភាគ​ច្រើន​អាហារូបករណ៍​ដែល​ផ្ដល់​ឲ្យ​គឺ​ថ្នាក់​អនុ​បណ្ឌិត វិស្វកម្ម​ និង​បណ្ឌិត។
ព័ត៌មាន​លម្អិត សូម​ចុច​ត្រង់​នេះ

៥.​អាហារូបករណ៍​កូរ៉េ
សារៈសំខាន់​របស់​អាហារូបករណ៍​នេះ​គឺ​ផ្តល់​នូវ​ការ​អប់រំ​ដ៏​មាន​ប្រសិទ្ធ​ ភាព​ដល់​សិស្ស​និស្សិត​អន្តរជាតិ​ដោយ​ស្មើ​ភាគ​គ្នា និង​បណ្ដុះ​នូវ​ភាព​ជា​អ្នក​ដឹក​នាំ​វ័យ​ក្មេង។ គួប​ផ្សំ​នឹង​ការ​ផ្លាស់​ប្ដូរ​នូវ​វប្បធម៌​ និង​ការ​បង្កើត​នូវ​ទំនាក់​ទំនង​យ៉ាង​ជិត​ស្និត​រវាង​កូរ៉េ ​និង​ប្រទេស​កំណើត​របស់​សិស្ស​និស្សិត​អន្តរ​ជាតិ​ទាំង​អស់។ រាជរដ្ឋាភិបាល​កូរ៉េ​ផ្ដល់​ប្រាក់​អាហារូបករណ៍ ​និង​ការ​ចំណាយ​ផ្សេងៗ​សម្រាប់​អាហារូបករណ៍​នីមួយៗ។
ព័ត៌មាន​លម្អិត សូម​ចុច​ត្រង់​នេះ

៦.​អាហារូបករណ៍​ជប៉ុន

​ជប៉ុន​បាន​បើក​លំហ​ជើង​មេឃ​សម្រាប់​សិស្ស​និស្សិត​ទូទាំង​ពិភព​លោក​ឲ្យ​ចូល ​ទៅ​សិក្សា​នៅ​ប្រទេស​របស់​ខ្លួន​ លើ​កម្រិត​ដូច​ជា​ ថ្នាក់​បណ្ដុះបណ្ដាល​វិជ្ជាជីវៈ  មធ្យម​សិក្សា​បច្ចេកទេស ឧត្ដម​សិក្សា ក្រោម​ឧត្ដម​សិក្សា និង​វគ្គ​សិក្សា​ភាព​ជា​អ្នក​ដឹក​នាំ​វ័យ​ក្មេង។
ព័ត៌មាន​លម្អិត សូម​ចុច​ត្រង់​នេះ

៧.​អាហារូបករណ៍​សិង្ហបុរី

ការ​សិក្សា​នៅ​ប្រទេស​កូន​នាគ​នេះ​ក៏​ជា​ក្ដី​ស្រមៃ​ជា​ច្រើន​របស់​សិស្ស​ និស្សិត​ខ្មែរ​ផង​ដែរ។ អាហារូបករណ៍​ភាគ​ច្រើន​ផ្ដល់​ដោយ​ក្រសួង​អប់រំ​ និង​រាជរដ្ឋាភិបាល​សិង្ហ​បុរី​ ចាប់​ពី​ថ្នាក់​អនុវិទ្យាល័យ​ដល់​បណ្ឌិត។ សម្រាប់​ថ្លៃ​សិក្សា ​និង​ប្រាក់​ឧបត្ថម្ភ​ផ្សេងៗ​ភាគី​សិង្ហបុរី​ជា​អ្នក​ធានា​រ៉ាប់​រង។
ព័ត៌មាន​លម្អិត​ សូម​ចុច​ត្រង់​នេះ

-ចង់​ដឹង​ពី​លក្ខខណ្ឌ​ទទួល​បាន​អាហារូបករណ៍​ពី​ប្រទេស​ផ្សេងៗ​ សូម​ចុច​ត្រង់​នេះ

អត្ថបទ៖ ផល្លា សុម៉ាលីណា

រូប​ថត៖ sites.peu

ដកស្រង់​ទាំងស្រុ​ង​ពីគេហទំព័រ sabay.com

២០​​សន្លឹក​​មិន​អាច​បំភ្លេច​បាន​​កាល​ពី​ព្រឹក​ម្សិលមិញ​នេះ!

ក្បួន ​​តុប​តែង​បែប​​បុរាណ​ មាន​ប្រវែង​ជាង​មួយ​គីឡូ​ម៉ែត្រ​ បាន​ដង្ហែ​ព្រះ​មឈូសា​កាត់​វិថី​សំខាន់​វែង​ខ្លី​ជា​ច្រើន​ ដែល​មាន​ប្រវែង​សរុប​ប្រមាណ​ជា​៦​គីឡូ​ម៉ែត្រ​ អម​សងខាង​ផ្លូវ​ដោយ​ប្រជាពលរដ្ឋ​ក្នុង​សំលៀក​បំពាក់​ស​ និង​ខ្មៅ។ នៅ​ពេល​ព្រះ​មឈូសា​ ទៅ​ដល់​ចំណុច​ណា​ ភាព​ក្ដុកក្ដួល​របស់​ប្រជា​ពល​រដ្ឋ​កាន់​តែ​រំជួល​ឡើង​ ពី​ព្រោះ​នេះ​ជា​ឱកាស​ចុង​ក្រោយ​ដែល​ពួក​គេ​បាន​ជូន​ដំណើរ​ព្រះ​បរម​សព​ ព្រះ​ករុណា​ ព្រះ​បាទ​សម្ដេច​ ព្រះ​នរោត្តម​សីហនុ។

នេះ​ជា​ទិដ្ឋ​ភាព​នៃ​ក្បួន​ដង្ហែ​ដែល​កម្រ​បាន​ឃើញ​​ណាស់​ កាល​ពី​ព្រឹក​មិញ​នេះ៖


(ដក​ស្រង់​ទាំងស្រុង​ពី http://news.sabay.com.kh/)

ស្គាល់​បឹងបៃតងទេ?

ក្រោយពីបម្រើការងារពេញមួយ ​ សប្តាហ៍ហើយនោះមន្ត្រីរាជការ បុគ្គលិកអង្គការក្រៅរដ្ឋាភិបាល  បុគ្គលិកក្រុមហ៊ុនឯកជននានា សិស្ស និស្សិត បានសម្លឹងទៅ រកកន្លែងកម្សាន្តលម្ហែកាយនានា ដើម្បីបន្ធូរបន្ថយ នូវភាពតានតឹងដែលពួកគេបានបំពេញការងារអស់រយៈពេលមួយ សប្តាហ៍កន្លងមក ។ បឹងបៃតងជារមណីយដ្ឋានថ្មីមួយដែលមានតូប លម្ហែកាយសម្រាប់ស្ទូចត្រី ភោជនីយដ្ឋាន ទីលានកីឡា និង កន្លែង កម្សាន្ត ដែលពេលនេះកំពុងមានការ ទាក់ទាញភ្ញៀវទេសចរភ្នំពេញ យ៉ាងច្រើនឱ្យចង់ទៅលម្ហែកាយនៅទីនោះ ។

បើយើងចង់ទៅស្ទូចត្រីលម្ហែកាយនៅ រមណីដ្ឋានបឹងបៃតង យើងចេញដំណើរពីភ្នំពេញតាមផ្លូវ សហព័ន្ធរុស្ស៊ី មុននឹងទៅដល់ពោធិ៍ចិនតុងនោះ យើង ត្រូវបត់ចូលតាមផ្លូវហាណូយ កាត់ផ្សារដីហ៊ុយដល់ វត្តសំរោងអណ្តែត ហើយបន្តដំណើរទៅមុខប្រមាណ ១០០ ម៉ែត្រ រួចក្រឡេកមើលខាងឆ្វេងដៃនោះ យើង នឹងបានឃើញស្លាកសញ្ញាមួយផ្ទាំងដែលបង្ហាញផ្លូវ ចូលបឹងបៃតង ហើយយើងបន្តដំណើរលើកំណាត់ ផ្លូវក្រួសក្រហមតែមួយគីឡូម៉ែត្រទៀតនោះ យើងនឹង បានទៅដល់គោលដៅ ។

បឹងបៃតងទើបតែចាប់ដំណើរការកាលពីថ្ងៃទី ៨ ខែ កញ្ញា ឆ្នាំ ២០១០ នេះប៉ុណ្ណោះ ប៉ុន្តែដោយសារ តែទីនោះមានអាកាសធាតុបរិសុទ្ធនោះ បានធ្វើឱ្យ រមណីយដ្ឋានថ្មីមួយនេះទាក់ទាញយកភ្ញៀវទេសចរ បានយ៉ាងច្រើន ដែលអ្នកទៅទីនោះម្តងហើយចង់ មកម្តងទៀត ។ កត្តាដែលធ្វើឱ្យបឹងបៃតងមានការ ចាប់អារម្មណ៍របស់ភ្ញៀវនោះ គឺទីនោះនៅជិតបង្កើយ ទីក្រុងភ្នំពេញ ដែលភ្ញៀវគ្រាន់តែចេញពីផ្ទះប្រហែល ១៥-២០ នាទី នឹងដល់កន្លែងលម្ហែតែម្តង ។

បើយើងនិយាយពីទេសភាពវិញ បឹងបៃតងគឺហាក់បីដូចជានៅស្រុកស្រែនាទី ជនបទដែរ ។ នៅជុំវិញកន្លែងស្ទូចត្រីមានទេសភាព វាលស្រែពណ៌ខៀវស្រងាត់នៅព័ទ្ធជុំវិញបរិវេណនោះ ហើយនៅខាងលិច និង ខាងជើង យើងបានក្រឡេក ឃើញដើមត្នោតដែលមានដើមខ្លះមានអ្នកឡើងត្នោត កំពុងតែត្រងទឹកត្នោត ធ្វើឱ្យទិដ្ឋភាពទីនេះរឹតតែគួរឱ្យ ចង់គយគន់ក្រៃលែង ។ នៅលើផ្ទៃដីជាង ១១ ហិកតារ របស់បឹងបៃតងមានស្រះទឹកយ៉ាងធំមួយនៅចំកណ្តាល ជម្រៅ ១៤ ម៉ែត្រ ដែលរំលេចទៅដោយតូបស្ទូចត្រី នៅព័ទ្ធមាត់ស្រះពីរជួរមានរាងជាអក្សរអិល  ដែល តូបនីមួយៗមានមនុស្សទៅស្ទូចត្រីលម្ហែពេញៗ ពិសេសនៅថ្ងៃសៅរ៍-អាទិត្យ ឬ ថ្ងៃបុណ្យទានម្តងៗ មានមនុស្សម្នាទៅស្ទូចត្រីលម្ហែចាប់ពី ៣០០ នាក់ ទៅ ៥០០ នាក់ ក្នុងមួយថ្ងៃៗ នាំគ្នាសម្រុកចូលទៅស្ទូចត្រីលម្ហែកាយនៅទីនោះ ។ រីឯថ្ងៃ ធម្មតាវិញ គឺយ៉ាងហោច ណាស់ក៏មានភ្ញៀវជាង ១០០ នាក់ នាំគ្នាទៅស្ទូចត្រីលម្ហែ នៅទីនោះ ។ ចំពោះសេវាបម្រើភ្ញៀវវិញ បឹងបៃតងមានសេវាកម្មល្អៗខុសពី កន្លែងលម្ហែកាយ ឬ កន្លែងស្ទូចត្រីដទៃទៀត ។ ការអង្គុយស្ទូចត្រីនៅបឹងបៃតង គឺមិនគិតប្រាក់ឡើយ ភ្ញៀវអាចយកសន្ទូចគ្រប់ប្រភេទពីខាងក្រៅចូលក៏បាន ដោយ គ្មានគិតតម្លៃអ្វីទាំងអស់ ហើយភ្ញៀវដែលគ្មានសន្ទូចត្រូវការចង់ទិញសន្ទូច គឺមានលក់ឱ្យជាស្រេចនៅទីនោះ ដោយសន្ទូចស្ទូចត្រីមួយតម្លៃ ១ ដុល្លារ ពេល ស្ទូចចប់ភ្ញៀវអាចយកទៅតាមខ្លួនវិញក៏បាន ។ ចំពោះ ត្រីដែលស្ទូចបានវិញ បើភ្ញៀវចង់ចម្អិនជាម្ហូបអាហារ នោះមានចុងភៅយ៉ាងចំណាននៅចម្អិនជូនដោយគិត តម្លៃត្រឹមមួយដុល្លារប៉ុណ្ណោះក្នុងការចម្អិនម្ហូបមួយមុខ ហើយចំពោះត្រីដែលស្ទូចបានវិញ បឹងបៃតងតម្រូវ ឱ្យភ្ញៀវបង់ប្រាក់ ៣ ដុល្លារក្នុងត្រីមួយគីឡូក្រាម ហើយ ត្រីដែលស្ទូចបាននោះបើភ្ញៀវចង់ឱ្យបឹងបៃតងធ្វើហើយ ប្រឡាក់នោះ អាចធ្វើបានតាមសេចក្តីត្រូវការរបស់ ភ្ញៀវដោយគិតថ្លៃសេវាអ្នកធ្វើត្រី និង ថ្លៃប្រឡាក់គ្រឿង គ្រៅ ២ ដុល្លារ ។ ចំពោះម្ហូបអាហារដែលលក់នៅទី នោះ គឺមានដាក់តារាងតម្លៃច្បាស់លាស់ដែលតម្លៃ ចាប់ពី ២ ដុល្លារទៅ ៤ ដុល្លារ ចំពោះម្ហូបទឹកមួយមុខ, ៥ ដុល្លារដល់ ៩ ដុល្លារចំពោះម្ហូបគោក ដូចជាគ្រឿងក្លែមផ្សេងៗ ។ ភ្ញៀវដែលទៅ ស្ទូចត្រីនៅទីនោះសុទ្ធតែបានត្រីត្រឡប់ទៅផ្ទះវិញគ្រប់ៗគ្នា គ្មាន អ្នកណាម្នាក់ដែលស្ទូចត្រីហើយមិនបានត្រីត្រឡប់ទៅវិញឡើយ ។ ត្រីដែលមាននៅក្នុងស្រះនោះ គឺអាចនិយាយបានថាជាត្រីធម្មជាតិ សុទ្ធសាធ ទោះបីត្រីខ្លះជាត្រីចិញ្ចឹមក្តី ព្រោះត្រីមួយចំនួនត្រូវបាន គេចិញ្ចឹមទុកវាអស់រយៈពេលបួនឆ្នាំមកហើយ ដោយពុំដែលឱ្យចំណី អ្វីវាស៊ីឡើយ គឺទីនោះមានចំណីធម្មជាតិរួចជាស្រេចទៅហើយ ។ នៅតាមតូបស្ទូចត្រីនីមួយៗយើងសង្កេតឃើញមានមនុស្សស្ទូចត្រី ពេញព្រៀប និង មានអ្នកខ្លះអង្គុយទទួលទានអាហារជាមួយត្រីដែល ស្ទូចបានថ្មីៗដ៏មានរសជាតិយ៉ាងឆ្ងាញ្ញ់ពិសាក្រៃលែងដូចត្រីដែលគេ រកបានពីក្នុងបឹង ឬ ក្នុងទន្លេធម្មជាតិអ៊ីចឹងដែរ ហើយក៏មានអ្នកខ្លះបានជាប់ចិត្ត ជក់មាត់ជាមួយរសជាតិនៃត្រីដែលទើបតែស្ទូចបានថ្មីៗនេះ ដោយពួកគាត់គិតថា មកទីនេះម្តងហើយពួកគាត់នឹងមកម្តងទៀត ដោយពួកគាត់និយាយថា រសជាតិត្រី នៅទីនេះឆ្ងាញ្ញ់ សេវាកម្មល្អ មិនថ្លៃ មិនកោរភ្ញៀវដូចកន្លែងដទៃ ឯខ្យល់អាកាស ក៏បរិសុទ្ធល្អដូចទីជនបទពិតៗ មិនបាច់ចំណាយពេលទៅលម្ហែកាយនៅទីជនបទ ឡើយ ។

មន្ត្រីក្រសួងមហាផ្ទៃម្នាក់ដែលសុំមិនឱ្យបញ្ចោញឈ្មោះបានឱ្យដឹងថា ចាប់ តាំងពីទីនេះបើកមក គាត់បានជ្រើសរើសទីនេះជាកន្លែងសម្រាកលម្ហែកាយ ពេល ខ្លះមកជាលក្ខណៈគ្រួសារ ពេលខ្លះមកជាលក្ខណៈមិត្តភក្តិ ពីព្រោះវាមានខ្យល់ អាកាសល្អបរិសុទ្ធ និង មានទេសភាពល្អ ។

និស្សិតម្នាក់ឈ្មោះ បញ្ញា សិក្សានៅសាកលវិទ្យាល័យភូមិន្ទភ្នំពេញ ដែល កំពុងតែកាន់សន្ទូចត្រីបានឱ្យដឹងថា គេ និង មិត្តភក្តិមួយក្រុមដែលមានគ្នាប្រាំបួន នាក់ ដែលមកស្ទូចត្រីនៅទីនេះមានការសប្បាយរីករាយណាស់ ព្រោះទីនេះ អាចធ្វើឱ្យពួកគេបន្ថយភាពតានតឹងដែលខិតខំសិក្សាអស់ពេញមួយសប្តាហ៍កន្លង មក ទុក្ខសោក ការនឿយហត់ទាំងប៉ុន្មានដែលមាន គេបានយកវាមកបញ្ចោញ ចោលនៅទីនេះ ដោយនាំយកទៅវិញនូវភាពបរិសុទ្ធ និង ទេសភាពស្រស់បំព្រង នៅទីនេះទៅជាមួយផង ហើយគេសង្ឃឹមថា ថ្ងៃក្រោយគេ និង មិត្តភក្តិ នឹងនាំគ្នា មកម្តងទៀត ។

អ៊ិន សុខុម អ្នកគ្រប់គ្រងនៅទីនេះបានឱ្យដឹងថា ក្រោយពីបង្កើតឱ្យមាន កន្លែងស្ទូចត្រីនេះហើយ បឹងបៃតងនឹងបង្កើតឱ្យមានកន្លែងលេងកីឡាផ្សេងៗជា ច្រើនទៀត ដូចជា កន្លែងវាយប៉េងប៉ុង ទីលានបាល់ទាត់ ៘ ដើម្បីបម្រើសេវា ឱ្យភ្ញៀវទេសចរមិនឱ្យទាស់ចិត្តឡើយ ពិសេសទៅទៀតនោះ បឹងបៃតងនឹងបង្កើត ឱ្យមានកសិ-ទេសចរណ៍ ដើម្បីបម្រើឱ្យទេសចរណាដែលចាប់អារម្មណ៍ ។ ក្រៅ ពីនេះ បឹងបៃតងយើងក៏មានគម្រោងថ្មីៗជាច្រើនទៀត ដើម្បីបម្រើឱ្យការកម្សាន្ត សប្បាយរបស់ភ្ញៀវផងដែរ ៕

 

ដកស្រង់ទាំងស្រុង​ពី phnompenhdailynews.com

ពុក​ម៉ែ ជូន​ពរ​កូន​ផង…!

ក្នុង ​១​ឆ្នាំ​ៗ​និស្សិត​រាប់​ពាន់​នាក់​បាន​ឡើង​មក​បន្ត​វិជ្ជា​នៅ​រាជធានី។ អាស្រ័យ​ដោយ​មិន​មាន​​កន្លែង​ផ្ញើ​ខ្លួន​ព្រោះ​ខ្វះលទ្ធភាពជួល​ផ្ទះ​ស្នាក់ ទើប​និស្សិត​ឡើង​មក​ពី​បណ្តា​ខេត្ត​មួយ​ចំនួន បាន​មក​ស្នាក់​នៅ​វត្ត។ បើ​ទោះ​ជា​មិន​បាន​ផ្ទះ​ធំ​ទ្រនំ​ខ្ពស់​ តែ​និស្សិត​ស្នាក់​នៅ​វត្ត ឬ​ហៅ​សាមញ្ញ​ថា “ក្មេងវត្ត” មាន​ក្តី​ស្រមៃ​ខ្ពស់​ជាង​កន្លែង​ស្នាក់​នៅ ព្រោះ​តែ​បាន​នៅ​ជិត​ព្រះ​ធម៌​ព្រះសង្ឃ​ដែល​ជួយ​ទាញ​ចិត្ត​មិន​ឲ្យ​ភ្លើត​ ភ្លើន។ ទោះ​យ៉ាង​ណា អ្នក​ដុះដាល​មាន​កំណើត​មិន​ទាំង​អស់​ទេ ទាំង​អ្នក​នៅ​ក្នុង​វត្ត និង​ក្រៅ​វត្ត​ក្នុង​ផ្ទះ​ធំ​ទ្រនំ​ខ្ពស់។

ថ្ងៃ ​នេះ លោក អួន ឧស្សាហ៍ ដែល​​ជា​ម្ចាស់​ពាន​រង្វាន់ “​អាណាចក្រ​តារា” ផ្នែក​ស្លៀក​សំលៀក​បំពាក់​ស៊ីវីល័យ​ប្រចាំ​ឆ្នាំ ២០១១ សុំ​បង្ហាញ​វត្តមាន​ធ្វើ​​ជា​ ក្មេង​វត្ត​មួយ​រូប ​ដែល​មាន​​​ក្តី​ស្រមៃជា​ប់​ក្នុង​ចិត្ត​ជា​និច្ចមួយ។

ចង់​ដឹង​ថា តើ​កម្លោះ​សង្ហារ​ម្នាក់​នេះ​ មាន​បំណង​ប្រាថ្នា​ ក៏​ដូច​ជា​ក្តី​ស្រមៃ​អ្វី​ សូម​មើល​ទាំង​អស់​គ្នា!

សកម្មភាព​និស្សិត​នៅ​វត្ត​

ចប់​ការ​សិក្សា​នៅ​សាលា ម៉ោ​ដល់​វត្ត​វិញ ត្រូវ​ធ្វើ​កិច្ច​ការ​ខ្លះ ដើម្បី​តប​ស្នង

ម្ង៉ៃៗ ជ្រុះមិន​ចេះ​​​សោះ! ទើប​តែ​បោស​មុន​ពេល​ទៅ​រៀន​សោះ​ ឥឡូវ​ត្រូវជ្រុះ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ ​​​​​​​​​​​​​​​​​​​ព្រាត​ទៀត​ហើយ

តែមិន​អី​ទេ… ព្រោះ​យ៉ាង​ហោច​ណាស់ ឯង(ដើម​កន្ទួត)​ក៏​បាន​ផ្តល់​ម្លប់​ឲ្យ​ខ្ញុំ​ជ្រក​​អាន​សៀវ​ភៅ​ដែរ…

រួច​ហើយ…គិត​​ទៅ​ដង​ទឹកម្តងសិន!

ដង​ឲ្យ​ពេញ​ម៉ា​ធុង​ហ្មង​ទៅ កុំ​ឲ្យ​ពិបាក​ចុះ​ឡើង!

ប្រហែល​ជា​ជិត​ពុះ​ហើយ…!

ចប់​ការងារ​ហើយ ទៅ​បង្រៀន​​អង់គ្លេស​ដល់​​ក្មេង​ៗ​ម្តង ហ៊ឺ​…ជួយ​ៗ​គ្នា​ទៅ ក្រែង​គ្នា​មិន​លំបាក​ដូច​ឯង!

ប្អូនៗ ថ្ងៃ​នេះ បងនឹង​បង្រៀន​ប្អូន​ៗ​ពី​​​អក្សរ​  A, B,C, D, E ចាំ​អាន​តាម​ពូ​ណា៎…!

ថ្ងៃ​ហ្នឹង​រៀន​ប៉ុណ្ណឹងសិន​ចុះណា ព្រោះ​បង​ត្រូវ​ទៅ​អាន​សៀវ​ភៅ​ត្រៀម​ប្រឡង​ផង​…!

អាទិត្យ​ក្រោយ លោក​គ្រូ​ឲ្យ submit Assignment ទៀត អ៊ីចឹង​ត្រូវ​តែ​ខំ​ មិន​អាច​ធ្លាក់​ទេ…!

ហ៊ឺ!! ទ្រាំ​លំបាក​ប៉ុណ្ណឹង មិន​ដឹងថា​ថ្ងៃ​ក្រោយ​ អាច​រស់​នៅ​សុខ​ស្រួល​វិញ​ ឬ​អត់​ទេ… !! តែ​យ៉ាង​ណា​ៗ ត្រូវ​តែ​ប្រឹង ព្រោះ​មិន​ដើម្បី​តែ​ខ្លួន​ឯង​ទេ គឺ​ដើម្បី​ពុក​ម៉ែ​នៅ​ស្រុក​ផង​ ពួកគាត់​លំបាក​ព្រោះ​តែ​ចិញ្ចឹម​យើង ម្ភៃ​ឆ្នាំ​ប្លាយ​ហើយ ដូច្នេះ​ត្រូវតែ​ឲ្យ​ស្រណុក​នៅ​គ្រា​ចុង​ក្រោយ​វិញ…!

ខាង​ក្រោម​នេះ​គឺ​ជា​ក្តី​ស្រមៃរបស់ ឧស្សាហ៍

ហ៊ឺ​…បើ​អ្វីៗ​ដើរ​ទៅ​តាម​ការ​គិត​ស្រមៃ ​ ​ពុក​ម៉ែ មិន​ដឹងសប្បាយ​​ប៉ុណ្ណា​ទេ ហ៊ឺ​ ពុក​ម៉ែ ជូន​ពរ​កូន​ផង…!

ទាំង ​​នេះ ដក​ស្រង់​ពី​ក្តី​ស្រមៃ​ពិត​​​របស់​និស្សិត​​​មក​​ពី​​ខេត្ត ស្វាយ​រៀង ​ម្នាក់​​ ដែល​​បច្ចុប្បន្ន​​​កំពុង​បន្ត​ការ​សិក្សា​ និង​​ស្នាក់​នៅ​ក្នុង ​វត្ត មណីរាម​ ហៅ​វត្ត​ ថាន់…៕

(ដក​ស្រង់​ទាំងស្រុង​ពី http://news.sabay.com.kh/)

%d bloggers like this: